یاش بولیب آقگنده هم یار کوزلریدن توشمه گین

توتمه سه آتینگ نی میلی سوزلریدن توشمه گین

ای گولوم گل دیک بولیب یورگین بهارینگ بو دیمک

قیغوریش لرگه نی کیره ک سینی یارینگ بو دیمک

او گوزه ل کوپ هم گوزه ل کوزگو گه سیغمس دور بیراق

کورمه گی سن بارلیگی نی شونچه لیک سیندن اوزاق

آی خانیم آپپاق بولیب تور یککه لیک هم یاقیشر

بو قرا ساچینگه یولدوزلرنی ییل لر تاقیشر

آی خانم کویله یورک تن سیوگیلی ایرتک لرینگ

قالگوسی سیندن بو تویغو، سوز ارا ایستک لرینگ

ایریلیش سیزدن شعر دن ایریلیش

تویغو لردن سیوگی لردن قییریلیش

ایریلیش سیزدن بو مین یوق من دیمک

کیمسه سیزلیک قایه لردن تیریلیش

بار بولینگ دایم اما بیر آز اوزاق

آشیریش هر نیرسه گه بولگی توزاق

آی بولیب آیدین له شیب پارلب تورینگ

قاره رنگده سیزنی یازسم هم سوزآق

سیندن ایری بولمه گن بیر بولیمینگ دیر اوزلیگینگ

قنچه قاچسنگ گرچگینگ دن بیللی دیر اوزبیک لیگینگ

سین کبی لرنی ینه بیگانه پرور دیدیلر

سین یوگورگین آرقه دن باشینگه بیز سر دیدیلر

سین اوزینگ بولالمه دینگ بیرباشقه سی بولگی می سن؟

بیر انیق له کیم لیگینگ نی بیلمه دن اولگی می سن؟

آنه تیل دن ایریلیب آنه ینگ گه حرمت قالدی می

کوکه نینگ دن قاچگه نینگ، کوکسینگده آغری سالدی می

ایزیلیش دن قاچمه گین بیریکمه گین کیل کوچلی بول

قییده هم قاچر ایدینگ سین بیلمه گنده قیسی یول

بو الاو یانگن اوزی اوت بولمه گین موندن کیین

سو بولیب آق دینگیزینده اونچه هم بولمس قیین

اوزلیگینگ نی قولگه آل ایرکین بولر سن اوزبیگیم

بار لیگینگه بیر ایشان کوچ گه تولر سن اوزبیگیم

نیگه اوزلیک نی یوقاتینگ نیگه اوزینگ بولمه دینگ

ایرگه شیب کیتمس ایدینگ کو نیگه کوچ گه تولمه دینگ

یلدیزینگ ییر آستیده! سو ییتمه دی می یا قویاش

سین کو بوران لرده توردینگ یلدیریم دن سولمه دینگ

تولقونینگ سیس سیزچه قالدی یاکه قانینگ بیتی می

تور ایاققه مینگه باقگین! سین تیریک سن اولمه دینگ

ایزیلیش لرده یوقالمه بوش لیگینگ ده ییره سن

بو گورش قانینگه بار دور نیچه یوز ییل کولمه دینگ

سینگه کوز تیکلب قرشگن نیچه یوزمینگ کوزگه باق

یاولرینگ مقتاوچی سی سین نیگه اوزینگ بولمه دینگ

کیچه لری سیس سیز لیکده  

آی گه باقیب

 سینی خاطر لش نی

و کونگلیم نینگ اینگ یالغیز کوشه لریده

سین بیلن بولیش نی سیوه من

کوزلرینگ قرشی سیده تامچی تامچی ایریش نی

و تانگ آتگونچه

سینگه شعر ایتیش نی سیوه من

آتینگ نی توتگنیم ده

خوددی ینگی آچیلگن گل کبی تیترش نی

خیاللریمده ایسه

قوللرینگ دن توتیش نی سیوه من

ایریلیق لردن

 کپه لک دیک اوز اطرافیم ده اورمه له گن ده

سیس سیزچه یانیش نی سیوه من

کولگن لریمده اوزیمگه قیزیش نی

ایغله گن لریمده ایسه کولیش نی سیوه من

مین سینی ایمس

سینی سیویش نی سیوه من

کوزلریم نینگ قاره تونیده

یاغدو بیرگن یولدوز بوله سیز

خیال لریز بیلن چومیلسم

تولقون لی بیر دینگیز بوله سیز

سیز ایری سیز باشقه بیری سیز

تویغو لرده سون  سیز بوله سیز

سیز اینجو سیز  قوم لر ایچینده

شونینگ اوچون یالغیز بوله سیز

تینگیز یوقتور ایشانینگ مینگه

مین سیوگن یار بیر سیز بوله سیز

ساچلریم سیرماغیگه کونگلینگ نی تاقسم میلی می

کون کیلیب قرشینگ ده توختب سینگه باقسم میلی می

کون کیلیب سرلشگنیم ده سوز تاپالمی قالسم و

بیر ایلیق تویغو بولیب بغرینگده آقسم میلی می

بو قویاش پارلاق بولگنده هم سما سیز بولمه سین

جان بدن سیز تینمه سین آدم هوا سیز بولمه سین

سیز بیلن مین بیر بوتون من سیزده معنا بوله من

بیگمیز سیزدن اوزاق قالیب خدا سیز بولمه سین

آنه جانیم قورقمه گین مین اوزیم ایندی آنه من

سین کبی مین هم سیزرمن خوددی سین دیک ده یانه من

قیغو لرده پیشتیم اوزی تاغ و تاش بولدیم آنه

باشقه کونگول لرنی آباد ایتگووچی بیخانه من

بیگم:

جان آلر جان لرنی یاقرهر باقیش ده کوزلرینگ

قیته قیته تیلبه قیلگی بیر یاقیش ده کوزلرینگ

اولتیریب قرشینگ گه باقی کوزلرینگه بیر عمر

مونچه لر بولگی گوزه ل می بیزه تیلگن خودی دَُ ر

دینگیزیده چومیلیب تولقون لریده باته من

کیپریگینگ نی سایه سینده اول دیسنگ هم یاته من

ایکی یولدوز ایکی آی ایکی سماء دیر کوزلرینگ

جان بیرووچی جان آلوچی یا خدا دیر کوزلرینگ

 بیر دوست:

بیگم:

جیم بولیب تورگن ده هم سوز دینگیزی دیرکوزلرینگ

ایتمه سنگ هم سیوه من دیب قویمه گن سرکوزلرینگ

سینی حسنینگ گه قیاس قیلمم جهانگه کیمسه نی

مینگ ته نی باشدن ایاققه ایریتر بیر کوزلرینگ

 مین گوزه ل لیک لرقویاشی، باقیشینگ بولگی  سما

کورمه سم کوزینگ ده رسمیم پارله مس من مطلقا

سینی قوپال لیک قیلیب ایریلگنینگ یالغان اوزی

سیوگی نینگ بیر سونی یوقتور تویغو ده یوق انتها

بیر دوست:

ایلدیریم دیک اوردی آتش جانمه شوق اوزره باش
باقیشینگ نی شوقی دن تولدی کوزوم یاش اوزره یاش

ساله من دیدینگ کشن گه، باغله دینگ محکم توتوب
صید مژگان بولدی کونگلوم یا که کوزینگ اوزره قاش

بیلمه دیم قنداغ قیلیب کونگلوم نی مدهوش ایله دینگ
بادۀ لعل لبینگ دن ، مست و سرخوش ایله دینگ

هرقچان سالسم نظر کوزگوگه ، کورگی من سنی !
سوزلرینگ نی سحریگه مجذوب و بیهوش ایله دینگ

 بیگم:

ایلدیریم ده کول بولیب بیر آن الاوینگ سونمه سین

هر باقیش گه قوش بولیب هر بیر قرش گه قونمه سین

کیت اوزاق قاچگین کیشن لر چمبری آغیر کیلر

 هر یشینگن سیوگی ده، بوکیلمه سین بوی سونمه سین

 سیوگی ده دعوا قیلیب اوزینگ نی مدهوش ایله مه

بوش خیاللر ایلگی ده کونگلینگ نی سرخوش ایله مه

کوزگو ده مینی ایمس کوزینگ نی کورگی سن ایشان

بو یوره ک ایستر! اویون مس، باشقه بیهوش ایله مه

بیردوست:

هر الو، بیر یلدیرم له باشلنیب ، کُل بوله دی ،
چرخ دوران هرایشی گه ، بیرتسلسل بوله دی

کُل بولیش دیرمقصدیم ، برق نگاهیگندن مینینگ
گر یوره ک گه اورسه آتش،عشق ِ بلبل بوله دی


زنده من ، بلبل کبی ، هردم خیال ِ گل بیلن
بیخود و سرمست من ، هنگامۀ سنبل بیلن

عیبم ایتمه ای رقیب ،رسوای دل بولدوم ینه
تاسحر اوینیدی کونگلوم حلقۀ کاکل بیلن

ای اوزاق بولگن قویاشیم آله من بیر کون سینی

بیریکیب بغریمگه باسیب قاله من بیر کون سینی

قورتیلیب قاچرمیدینگ سین سیوگی کوچلی دیرایشان

سوز بیرر من بو کیشن ده ساله من بیر کون سینی

    * *      * *      * *      * *

راضی من مین بوحیات دن میلی ساغینچ بولسه گر

برچه قیغوگه چیدر من سونی سیوینچ بولسه گر

سین بیلن دوزخ گوزه ل دیر بولمه سنگ جنت عذاب

کوچلی بولگی من ایشانگین بو یوره ک تینچ بولسه گر

    * *      * *      * *      * *

سینی دیب مین یکه لیک لر ایلگی ده سرسان من

شو بوزیب قویگن یوره ک کعبه سیده ویران من

کیتگنینگ ده مین ایمس حتی بولوت هم ییغله دی

ییر یاریلدی قیغو دن مین کو فقط انسان من

    * *      * *      * *      * *

قنچه لر باقسم یوزینگده،  قیته لب باقگیم کیلر

باقیشینگده کوزنی مس کونگول نی هم یاقگیم کیلر

سینی الله بوش بولگن ده بیزه تیب قویگن مو کین

سو کبی باشدن ایاققه شیرمیلب آقگیم کیلر

چرچه گن من

بیر اوزون اویقو گه کیتسه کوزلریم

یولده باقیب قالگنی ده

یا بیتیرسه توش کوریش نی

یا که بیتسه کوزلریم

Design by : Night Skin

RSS